EKE-k oroimen kolektiboaren multimedia kioskoa plazaratu du

2020ko irailean estreinatu zen "Eleketa, ahozko memoria" erakusketa ibiltariaren aurkezpena urtarril hondarrean bukatu zen Hazparnen, arrakasta handia bilduz.

Hazparneko lurraldean bildutako ahozko materialaren inguruko bitartekaritza lana aitzina eramateko, sei hilabeterako, borna interaktibo bat utzi dugu Pierre Espil mediatekaren esku.
Multimedia kiosko baten irudiko, euskarazko eta frantsesezko azpitituluak dituzten 200 bideo-pasarte inguru kontsultatzeko aukera ematen du.
Lekukotasun zati horiek gure Mintzoak.eus ahozko memoriaren atarian ikusgai daude ere bai.

Mediatekako tokiko funtsaren ondoan kokatua den borna hori prototipo bat da, etorkizunean bikoizten ahalko dena, Pirinio-Atlantikoetako Departamentuarekin elkarlanean (Eleketa bilketaren obragintzalaria izanik), eta bertako herriko etxeekin lankidetzan.
Horrela, mailegu hitzarmenen bidez, hurrengo hilabeteetan Donibane Lohizuneko mediatekan edo Donibane Garazin ezartzen ahalko dira bornak, Hazparnen bezala, "Eleketa, ahozko oroimenak" erakusketa aurkeztu ondoan, tokian tokiko lekukotasunak kontsultagarri izan daitezen.