2019ko abenduaren 5etik 8ra, Durangoko Azokak bere 54. edizioa ospatuko du Bizkaitar hiriko Landako gunean. Gerediaga elkarte antolatzailearen eta Euskal kultur erakundearen arteko orain duela hamahiru urte abiatu partaidetzaren karietara, Ipar Euskal Herriko egituren hainbat ekoizpen deskubritzeko parada izanen da.
"Durangoko azoka ekosistema berezi bat da", dio Gerediaga elkarteko lehendakari den Nerea Mujicak. "Gune, babesle eta eragile ezberdinen artean antolatzen da. Sortzaile, hartzaile, argitaletxe, autoekoizle, diskoetxe eta bisitariok partekatzen dugu. Gazte, heldu, ume, ikasle, langile, erretiratu, kuadrilla, … denona da. Literatura, musika, arte eszenikoak, ikus-entzunezkoak, kultura digitala…hori dena osotasun bat da".
Ekosistema honen irudi bat proposatzen du Oier Zuñiga artista iruindarrak. Sortu zuen kartelak lau zati bereizten ditu, eta bakoitzak Azokako ezaugarri bati erreferentzia egiten dio: burua (sormena), bularra (zabaldu-erakutsi), gerria (hartu eta eman), eta hankak (akzioa eta mugimendua).
Iparraldeko partaideen ekoizpenak naturalki sartzen dira lelo honen ildoan. 2019an ere, berritasun ugarirekin izanen dira azokan. Urtero bezala, proposamen anitza izanen da eta kultur ekoizpen zabal bat aurkituko da: haur literatura, eleberriak, olerki bildumak, diskoak, …
2006an abiatu Gerediaga elkarte antolatzailearen eta Euskal kultur erakundearen arteko partaidetzari esker, Ipar Euskal Herriko ekoizpenak argiago agertzen dira Durangoko azokan (ikus. Ipar Euskal Herriko egiturek Durangoko Azokan laguntzeko programa). Urtero azokan aurkeztuak diren berritasunen artean guti gorabehera %10a Iparraldeko ekoizpenak dira: 2019an, 45 berritasun aurkitzen ahalko dira Iparraldeko erakusmahaietan.
Egin ohi den bezala liburu batzuen aurkezpen publikoak burutuko dira azoka denboran. Iparraldeko idazleak eta artistak ere ez dira faltako (ikus agenda).
14 kultur ekitaldi: 5 aurkezpen, 4 kontzertu eta 5 proiekzio
Iparraldeko egiturak
2019an, Iparraldetik 10 egitura izanen dira azokan: 7 argitaletxe, 2 diskoetxe eta bestelako egitura bat. Iparraldeko partaide guzi hauek, beste urteetan bezala, espazio bateratu batean elkartuko dira (Goienkale 21-29). Elkar argitaletxearen Iparraldeko adarra Elkar-en mahai nagusian ordezkatua izanen da.
