Drist-drast

Zer oroimen pizten du segaren drist-drastak ?
Lehenik eta behin mendiko inguramenekoa
Nola eramaten zuen osabak bere sega bizkarrean 
Bere jarrera zangoak zabalik oinak abarka beltzetan loturik
Atorraren mahukak bildurik
Kapelua buruan finkaturik
Lan gogorra eguzkiak hortzak zorrozten zituelarik 
Zatoa hartu eta etxeko sagarnoari hurrupa batzuk bota ondotik
Eskuarekin ezpainak lehortu eta … berriz haste

Ni, hiriko haurra begiak zabal zabalik

Zer oroimen zirikatzen du segaren drist-drastak ?
Harriarena sega zorrozten, krix-krax-krix-krax 
Harririk gabe segatzerik ez
Eskuetan listua bota, eskuak bata besteari igurtzi eta …berriz haste
Begietan ditut besoen zirkinak
Eskuak bata besteari heldulekuan uztartuak 
Bata besteari agindu isila emanez
Segaren itzuli bakoitzarekin osabaren haha… azkar bat 
Barneko barnetik askaturik
Ez, ez zen hemen ez kirolik, ez eta ere jokorik,
Baina oinarrizko lan bat beste hainbestekin loturik

Ni, hiriko haurra begiak, belarriak zabal zabalik

Zer oroimen ziztatzen du segaren drist-drastak    ? 
Burunba batean ortzantzaren arriskua
Sega, argi indar emaile neurtezina bilakatuz
Arriskua, lanjera, fite, fite, kaxu, kontuz !!!
Bati baino gehiagori gertatu baitzaio
Deskarga hartzea eta ezbeharra gertatzea

Zer oroimen goxatzen du segaren drist-drastak   ?
Erritmo bat drist-drast drist-drast
Belarra belaunikatzen eta buruz behera erortzen
Drist-drast uhain berde baten gisa belarra aldez alde lerrokatzen
Eta bere azken indarretako lurrina eskaintzen 
Flakoietan sar ezina airean askatzen

Eta ni hiriko haurra begiak, belarriak eta sudur bideak zabal zabalik

Orain muinetan beste hainbeste oroimenekin loturik

Osaba joan zait, drist-drast  beste segak
Eta ni hiriko haurra izana 
Nire haurtzaroko erroetan murgildurik drist-drast !

Eusebia