IBILKI programa: euskal kulturaren aniztasuna hedatzen Iparraldean

Ipar Euskal Herrian euskal antzerkiaren hedapena sustatzeko sortu genuen IBILKI dispositiboa, orohar euskal ikusgarrigintzaren eta beste adierazpen artistikoen zabalpenaren zerbitzuko emana izanen da pixkanaka-pixkanaka. Hasteko, programaren 12. edizioaren karietara, hainbat zinema saio, antzerki eta dantza emanaldi bai eta hainbat kontzertu ere aurreikusiak dira Ainhoan, Baionan, Senperen, Ziburun, Hendaian, Maulen, Arrosan, Donapaleun, Urruñan, Hiriburun, Ortzaizen eta Donibane Lohizunen. Bigarren seihilekorako egitaraua sarean da, programan parte hartu duten herriei esker.