Azken 20 urteotan Euskal kultur erakundeak, eragileek eman datuetatik abiatuz eta euskarri desberdinetako prentsa/sare sozialen errepaso baten laguntzaz, Ipar Euskal Herri mailako euskal kulturaren agenda osatzen du egunez egun (mintzaldiak, kontzertuak, animazioak...). Ondorioz, urteko kultura ekitaldiei buruzko ikuspegi orokor baten ukaiteko parada ematen digu. 2024an sartu gertakarien sintesia estatistiko labur bat proposatzen dugu hemen.
1947 gertarkariren datak argitaratuak izan dira 2024an gure agendan. Haietarik 1569 Ipar Euskal Herriko probintziekin zerikusia zutelarik (Lapurdi, Baxenabarre eta Zuberoa) eta gaineratekoak Hego Euskal Herriarekin edo Euskal Herritik kanpoko eremuekin.
2023ko datuekin konparaketa bat egiten bada, ikus dezakegu emaitzak biziki hurbilak direla. Gertakari motei begira azpimarratzen ahal da zinema/bideo ekitaldiek gorakada narbarmena ukan dutela, ikuskizunek gorakada ttipia eta animazioek beherakada. Urtean zeharreko daten banaketari dagokionez, badirudi ekitaldien kopurua nahiko orekatua egoten dela hilabetez hilabete: 100 eta 150 ekitaldi artean zerrendatzen ditugu hilabetero. Datuak lurraldez lurraldez aztertu ondoan ez da aldaketa handirik nabari 2023tik 2024ra.
Daten banaketa gertakari motaren arabera
Ipar Euskal Herriko ekitaldien daten banaketa gertakari motaren arabera. 2024ko datuak | Iturria: eke.eus - Agenda
Erabiltzen dugun terminologia
Gertakari mota
Azalpena
Erakusketak
Mota guzietako erakusketak (arte plastikoak, erakusketa didaktikoak...).
Hitzaldiak
Mota guzietako hitzaldiak (liburu aurkezpenak, gai baten aurkezpena, eztabaidak, irakuraldiak, omenaldiak...).
Ikastaroak
Noizbehinka publiko zabalari proposatuak zaizkion mota eta gai desberdinetako prestakuntza laburrak (tailerrak, formakuntzak...).
Gertakari erritualak
Urtean zehar iragaiten diren egutegiari lotu ospakizunak eta besta erritualak (maskaradak, inauteriak, solstizio bestak...) sartzen dira atal horretan.
Bertso saioak
Mota guzietako bertsu saioak (bertso apairuak, saioak, txapelketak...).
Festibala & ekitaldiak
Festibalak eta egun bateko gertakariak. Herri Urrats bezalako ekitaldi jakin horiek hitzordu desberdinez osatuak dira gehienetan (animazioak, erakusketak, kontzertuak) baina ez beti.
Zine - Bideo emanaldiak
Euskal zinema emanaldiak eta dokumentalen proiekzioak.
Ikuskizunak
Ikusgarri biziduna alorreko ikuskizunak (dantza, antzerkia, zirkoko eta karrikako arteak).
Kontzertuak
Estilo guzietako musika eta kantu kontzertuak (rock, a capella, abesbatzak, orkestrak ea.).
Animazioak
Atal honetan biltzen ditugu gainerateko kategorietan sartzen ez diren gertakariak. Gehien-gehienetan dohainik direnak - salbuespenak salbuespen - eta iraupenaren aldetik aski mugatuak (zonbait oren gehienik).
Daten banaketa urtean zehar eta gaiaren arabera
Ipar Euskal Herriko ekitaldien daten banaketa hilabeteka eta gaiaren arabera. 2024ko datuak | Iturria: eke.eus - Agenda
Daten banaketa zonaldeen arabera
Ipar Euskal Herriko ekitaldien daten banaketa lurraldeen arabera. 2024ko datuak | Iturria: eke.eus - Agenda
Oharra: Nahiz eta ahal bezainbat zehatza izan sintesia lan honek bere mugak dauzka, batez ere informazio bilketari eta argitaratze irizpideei lotuak. Alde batetik ezinezkoa da lurraldez lurralde antolatuak diren ekitaldi guztiak kondutan hartzea. Ospakizunen eta erritualen garaian (inauteriak, kaskarrotak, olentzero...) edo udara buruz loratzen diren herriko besten sasoi betean adibidez neke da euskal kulturarekin zerikusia duten gertakari oroen zerrendatzea, batzuk auzo mailako ingurune hurbilean iragaiten direnean gainera. Bestalde argi da euskal kulturaren arloen sartzen diren gertakariak bereiztea interpretazio kontu bat izaten ahal dela, batez ere euskararekin lotura gutti duten arte plastikoak bezalako alorrei begira. Gure hautespen-irizpideak beti izanen dira hobetzekoak eta nahitaez mugatuak euskal kulturaren definizio errazionalik ez baita. Arrazoin guzti horiengatik sintesia honetan agertzen diren datuak eztabaida eta osa daitezke. Halere uste dugu lurralde honetako zonbait tendentzien berri ematen duela.
