"Oroitzen naizeino" ikusgarriaren estreinaldia Ziburun

2017/10/17

Fred Berruet

agenda@eke.eus

2017/10/17

2017ko urriaren 20an, 18:30etan, Maddi Zubeldiak eta Bernadette Luro Iratzokik "Oroitzen naizeino" ikusgarri berria aurkeztuko dute Ziburuko Ezpeletenian. Zahartzea eta Alzheimer-eko eritasuna gaitzat hartuta, euskarazko irakurketa eta taularatze saio bat eskainiko digute, Agurtzane Anduetzaren bideo baten laguntzaz. Euskal kultur erakundea partaide da.

"Oroitzen naizeino" ikusgarriaren estreinaldia Ziburun — Maddi Zubeldia

Ikusgarri hau 2017an Maddi Zubeldiak Compagnie des Syrtes konpainiaren egoitzan egin idazketa egonaldiaren ondorio bat da.

Zer da zahartzaroan memoriak ihes egiten duelarik gelditzen dena ? Non dago pertsona egoera fragmentatu horretan ?

Itxura eta gaztetasunkeria nagusi den garai honetan, hitza eman nahi izan diot zaharrari, zahar eta eri dagoenari, akats bikoiztunari hots, gure beldurrik handienari agian.

Zaharra ez da izandakoa. Zaharra hor da, oso-osorik, izan denak eta denak bateginik,ikusi nahi duenarentzat opari,beldurra alde batera utzita bide berria eskaintzen duen harremana.

Pertsonaia nagusia zahar etxean dagoen adineko emaztea da. Bere gogoetak, ohar sinpleak egiten ditu, eta oraian kokatua bada ere, oroitzapen batzuk ekartzen ditu gogora. Guti baina. Eritasunak jota memoria galtzen ari baita.

Bigarren pertsonaia memoria da hain zuzen, joan-jinak eginen dituen pertsonaia, laguntzera etorriko zaiona,tarteka lehenik, gero eta toki gehiago hartuz, emaztea hitzik gabe geratzen delarik erreleboa harturik, ordezkatzeraino.