Herri Ixilean erakusketa Biarritzeko mediatekan
2011ko uztailaren 7tik abuztuaren 27ra, Jon Cazenave donostiarraren "Herri Ixilean" erakusketa ikusgai izanen da Biarritzeko mediatekan. Euskal kultur erakundeak, Getxoko Udalak eta Getxophoto elkarteak ekoiztu erakusketa honetan, zuri-beltzeko hogeita hamar argazki ikusgai dira, Cazenave abizenaren jatorrian oinarritzen direnak.
Jon Cazenave, Donostian sortutako argazkilari gaztea da : "Baiona bisitatu nuen behin eta "Chemin de Casenave" izeneko kalera ailegatu nintzen. Une horretan, Iparraldean nire abizen eta familiaren arrastoari jarraituko niola erabaki nuen". Jonek bidaia batean, bere abizenarekin lotutako leku, subjektu eta gertaera historikoen inguruko informazio bilaketan oinarritutako proiektua garatu du. Interes hori, jatorri horien aurkikuntzan baino, gehiago oinarritzen da Iparraldean zehar, Hegoaldetik abiatuta eginiko bilaketa-prozesuan.
Hogeita hamar bat argazkiz osatutako erakusketa honek, argazkilariaren sendimenduetan ere ibilbide bat proposatzen digu. Txuri beltzean eginiko irudiek ikuslea giro berezi batean sarrarazten dute: "Nik bideari ematen diot garrantzia, ez argazkiei" dio Jonek. Azkenean, irudien bidez, argazkilaria agertzen da: bere beldurrak, emozioak, momentu alaiak, magikoak
Erakusketa, uda osoan Biarritzeko Mediatekan ikusgai izanen da. Bestalde, horren inguruan hainbat ekitaldi iraganen dira baita ere. Hasteko, uztailaren 13an, Jon Cazenave-rekin topaketa bat iruditan egiten ahalko da 18:00etatik goiti, estreinaldiaren kari.
Udan zehar erakusketaren inguruan iraganen diren ekitaldiak :
- Uztailaren 13an, asteazkenarekin, 18:00etan: Estreinaldia: Topaketa iruditan Jon Cazenave argazkilariarekin
- Uztailaren 23an, larunbatarekin, 16:00etan: Txomin Peillen-en mintzaldia "Garonatik Ebrora: euskal eta gaskoindar toponimiak eta izenak historiaren lekuko" (frantsesez) - Eusko Ikaskuntzaren partaidetzarekin
- Abuztuaren 11n, ostegunarekin, 18:00etan: Junes Casenave Harigileren mintzaldia "Bizi aberats baten ezaugarriak" (frantsesez)
- Abuztuaren 20an, larunbatarekin, 18:00etan: Erakusketaren bisita bertsotan: Sustrai Colinaren eskutik
- Abuztuaren 27an, larunbatarekin, 17:00etan: Begiz Begi taldearen kontzertua
Sarrera urririk
Antolatzaileak : Biarritzeko herria eta Euskal kultur erakundea
Xehetasunak :
- Euskal kultur erakundea: Maia Etchandy - maia.etchandy@eke.org
- Biarritzeko Mediateka: Aña Mari Grenié - am.grenie@biarritz.fr
- Herri Ixilean erakusketa
Harpidetu doan gure buletinera
Euskal kultur erakundearen berripapera (Hilabetean behin)
